ጊዜ ሁሉን ይፈታል የሚለው አባባል ትኩረቱ የቀናት የወራትና የዓመታት ማለፍ ላይ ብቻ እንዳይሆን መገንዘብ ተገቢ ነው። ጊዜ ይበልጡኑ ለአስተሳሰብ ለውጥ፤ ለዕቅድና ለአቅጣጫ መሻሻል፤ ለበለጠ ያሠራር ዕውቀት፤ ከጥፋት የመማርም ዕድል ይፈጥራል። እኛም ጊዜ ይህን ያተረፈልን መሆኑን የተሻለ የገንዘብ ማግኛ ዘዴ በሥራ ላይ እንዲውል ማድረጋችን መስክሯል። ከእለታት አንድ ቀን ቦርዱ የተሰበሰበበት ዋናው መነጋገሪያ የቤተክርስቲያን ሕንጻ መግዛትና ለዚህ ቀዳሚ የባንክ ተከፋይ ማግኘት ላይ ሆነ። ይህንን በሥራ የሚተረጉም ኮሚቴ ለማቋቋምና ኮሚቴው የገንዘብ ማሰባሰቢያ ዘዴ ፈጥሮ እንዲያቀርብ ቦርዱ ወስኖ ኮሚቴው ተሰየመ። ከቦርዱ በተጻፈ ደብዳቤም እያንዳንዱ አባል አገልግሎት እንዲሰጥ ተጠየቀ።

በተሰየመው ኮሚቴ እንዲያገለግሉ የተጠየቁት፤ አቶ ዘውዴ በዳዳ፤ አቶ ሳሙኤል በቀለ፤ አቶ ተስፋሚካኤል ካሣዬ፤ አቶ ደሳለኝ ካሣ፤ ዲያቆን እስጢፋኖስ ስዩም፤ ወይዘሪት ኑኑ ጌታቸው (ነፍሷን ይማር በሥጋ ሞት ተለይታናለች)፤ ወይዘሪት ራሔል ክንፈ፡ ሲሆኑ ዲያቆን እስጢፋኖስና ወይዘሪት ራሔል በመፈራረቅ በሊቀመንበርነትና በጸሐፊነት አገልግለዋል። አቶ ሀብተ ሚካኤል ካሣዬ ቦርዱን ወክሎ በታዛቢነትና ገለጻ ለሚያስፈልጋቸው ጉዳዮች ለመርዳት ተሳታፊ ነበር። ኮሚቴው ከመጀመሪያው ቦርዱ ባተኮረበት የገቢ ማግኛ ዝግጅት ላይ በሚያረካ ሁኔታ እየተገናኘ ተነጋግሮና እቅዶች አውጥቶ ትልቅ የራት፤ የቅርሳቅርስ መጎብኛና የትምሕርታዊ ንግግር መስሚያ ዝግጅቶች ተቀነባበሩ። ቀደም ብለን ባማካሪነት የረዱን የቤተክርስቲያናት መሪዎችና ሌሎችም የዩኒቨርሲቲ መምሕራን ተጋበዙ። ፕሮፌሰር ኤፍሬም ይስሐቅ በስታንፎርድ ዩኒቨርሲቲ የሴሜቲክ ሃይማኖትና ባሕል ፕሮፌሰር የምሽቱ ተናጋሪ እንዲሆኑም በቦርዱ ተጋበዙ። በዚህ ምሽት በቤተክርስቲያናችን ታሪክ እጅግ የተሳካና ላቀድነውም ከሌላውም ጊዜ ሁሉ የበለጠ ባንድ ምሽት $ 65,000 ተሰብስቦ ሌላ 65,000 ብር በየጊዜው ሊከፈል ተስፋ የተገባበት ነበር።

ከሌላ ስቴቶች በተለይ ከሚኔሶታ መድኃኔዓለም ቤተክርስቲያን ሊረዱን የመጡትን መዘምራንና በተለይ ከመዘምራኑ መካከል ሰብለ በዝማሬና በከበሮ እየተዟዟረች የየሰዉን መንፈስ እጅግ በመቀስቀስ ትልቅ አስተዋጽኦ አድርጋ ነበረ። በፕሮፌሰር ኤፍሬም የተሰጠውን ትምሕርታዊ ገለጻ ብዙዎች፤ በተለይ እንግዶቻችን እንዳደነቁትና በጠቅላላውም በምሽቱ ዝግጅት የተደሰቱ መሆናቸውን ባድናቆት አካፍለውናል። ለኛም ይህ ገቢ ነበር የምንገዛውን የቤተክርስቲያን ሕንጻ ማየት ያስጀመረንና እስከፍጻሜውም እንድንገፋ ያበረታታን። ይህ የሆነው በምዕራብያውያን አቆጣጠር ሰኔ 6 ቀን 1996 ነበር። ይህን ለማቀነባበር የተሰየመው የኮሚቴ አባሎች፤ ኋላ እራሳቸውን የጁን ሲክስ (June six) ኮሚቴ ብለው ራሳቸውን ይጠሩበት ነበር። ቤተክርስቲያናቸው፤ የሰየማቸውም ቦርዱ እጅግ አመስግኗቸዋል። ዲያቆን እስጢፋኖስ ስዩም፤ ሕንጻ ቤተክርስቲያን ገዝተን እስከወጣንበት ሁለት ዓመት ጊዜ በተስፋ የተያዘውን በማሳሰብና በማስታወስ የሚበዛው እንዲገባ በማድረግ ተጨማሪ አገልግሎቱን አበርክቷል።

በዕለቱ የራት ግብዣ የተሰበሰበው ገቢ ቀደም ብሎ ከባንክ ከነበረን ጋር ለተቀዳሚ ክፍያ ይበቃል በማለት፤ ለሽያጭ የወጡ ሕንጻ ቤተክርስቲያናትን በጋዜጣም በጥቆማም በቡድን እየሆንን ማፈላለግ ጀመርን። ብዙዎቹ ወደኅብረተሰቡ መኖሪያ ቀረብ ብለው የተገኙት ፍላጎታችንን የማያሟሉ ከመሆናቸውም በላይ ዋጋቸው የማይቀመስ ነበር። ጥቂት የማይባሉ ቤተክርስቲያኖችን ከተመለከትን በኋላ ቀድሞ የሰርቢያ ቤተክርስቲያን የነበረ 9805 ደቡብ ኮሜርሻል አቬኑ ላይ ያለ አካባቢው ጭምር በልማት ድርጅት ተገዝቶ ቤተክርስቲያኑ ለሽያጭ ወጥቶአል ማለትን እንደሰማን ብዙዎቻችን፤ በተለይም አባታችን አባ ተክለሚካኤልና ወንድማችን አቶ ካሣሁን አየለ ደጋግመን  ስናየው ቆየንና ያለንን አስተሳሰብ ተካፈልን። እጅግ የሚበዙት የቤተክርስቲያኑ ቤተሰቦች ቤተክርስቲያኑን መውደዳቸውን ገልጸው እንዲገዛ ደገፉ። ጥቂቶች ከመኖሪያ ሰፈር ይርቃል በማለት ቅሬታቸውን አስታወቁ፤ ጥቂቶችም የአካባቢውን ጸጥታ በመጠራጠር ድጋፋቸውን ነሱ።

ጸጥታውን በሚመለከት ጥቂቶቻችን ከሐሮልድ ዋሺንግተን መጻሕፍት ቤት ሔደን ሰፊ የየመንደሩ የወንጀል ጥናት መዛግብትን በመመርመር ቤተክርስቲያኑ ያለበት ሰፈር ወንጀልን በሚመለከት ብዙዎች ኢትዮጵያውያን ከሚኖሩበት ከሰሜኑ የቺካጎ አካባቢ የተሻለ መሆኑን ተረዳን። ቤተክርስቲያኑን ለመግዛትም 95 በመቶ የሚሆነው የቤተክርስቲያናችን ቤተሰብ እንዲገዛ በማጽደቁ ቦርዱ በመግዛቱ ቆርጦ የባንክ ብድር መፈለግ ጀመረ። የሐሪስ ባንክ የተሻለ የወለድ ልክ በመስጠቱ ተዋውለን በምዕራባውያን አቆጣጠር በመጋቢት ወር 1998 ዓም የቤተክርስቲያኑን ሕንጻ ከመንገድ ባሻገር ካለ ሰፊ የመኪና ማቆሚያ ጋር ገዛን። የቤተክርስቲያኑ ሕንጻ በ1926 ዓም በሰርቢያኖቹ በእጃቸው እንደተሠራ በየጊዜው ከቤተክርስቲያናችን የማይጠፋ ወዳጃችንና ደጋፊ የሆኑ የሰርቢያ ተወላጅ ቀድሞም ለብዙ ዓመታት በዚሁ ቤተክርስቲያን ቤተሰባቸው ይገለገል የነበረ ወ/ሮ ሚራ ሳቪች በየጊዜው ከታሪኩ ጋር ያጫውቱናል። በዚያ ዘመን ከምሥራቅ አውሮፓ በልዩ ልዩ ሙያ የሰለጠኑ ሰርቢያውያን በብዛት ወደአሜሪካ መጥተው በአካባቢው የብረት ማውጫ ትልቅ ኩባንያ በነበረበት steel city ተብሎ ይጠራ በነበረው ለሥራው ሲሉ ሰፍረው ቤተክርስቲያናቸውንም ሊያቋቁሙ ቻሉ። በአሁኑ ጊዜ ወደ አስር ማይል ዝቅ ብሎ ላንሲንግ ከተባለ መንደር ሰፊ ቦታ ገዝተው ቤተክርስቲያናቸውንና ሰፊ የሚያከራዩት የሕዝብ መገልገያ አዳራሽ ከዚያ በማቋቋማቸው ነው ይሄኛውን የሸጡት።

የግዢ ቅደም ተከተሉን ለማሟላት ከሐሪስ ባንክና ከሕንጻው ባለንብረት ኩባንያ ወኪሎች ጋር መደራደሩና መፈራረሙ ተከናውኖ ሕንጻውም የተሠራው በድሮ አስቤስቶስና ሌድ ለጤና ጠንቅ መሆናቸው የጎላ እውቅና ባልነበረት ዘመን ስለነበረ በምርመራ ለጉዳት ሊያጋልጡ ይችላሉ የሚባሉት እነዚህ የግንባታ ግብዓቶች በተለይ ከማሞቂያ ሞተር ክፍልና ከወለሎች እንዲነሡ ተደረገ። ከዚያም ሕንጻውን በመረከብ የራሳችን የሆነ ቤተክርስቲያን ባለንብረቶች ሆንን። ቤተክርስቲያን ስንፈልግ በቆየንበት ጊዜ ሁሉ ከልባችን የገባ ወይም በምንገዛው አቅም አካባቢ የሆነ ለሁለት ዓመታት ሳያጋጥመን በመቅረቱ ብዙ ጊዜ ብዙዎቻችን የምንለው “መድኃኔዓለም ለኛ ያለውን ያቆየናል” ነበር። ይህም ከብዙ የቤተክርስቲያናችን አባላት አፍ ተሰምቷል። የሕንፃ ቤተክርስቲያኑ አቀማመጥ፤ የምንጠቀምባቸው ዕቃዎች ተሟልቶ መገኘት፤ ብቃት ያለው የሰንበት ትምሕርት ቤት ከቅጥሩ ግቢ መኖር፤ እንደልብ የመኪና ማቆሚያ መኖሩ በዚያ ላይ ዋጋው የምንወደው መሆኑ እውነትም መድኃኔዓለም ያቆየልን ነው። ለጥቂት ወራት ለመቅደሱ ሥራና ለአገልግሎት የሚሆኑ አባታችን በዝርዝር ያስቀመጧቸው በምእመናኑ እየተገዙ ወይም እየታዘዙ እስኪሟሉና የመቀባትና የማጽዳት የትብብር ሥራ እስኪፈጸም፤ አባታችንም ለመቅደሱ ውስጥ አገልግሎት አስፈላጊ የሆኑትን ከኢየሩሳሌም ይዘው እስከሚመጡ አገልግሎቱ የተሟላ ሳይሆን ቆየ። የቤተክርስትያኗንን የሰንበት ትምሕርት ቤቱንና የካሕን መኖሪያውን ውስጡንና ውጪውን ለማጽዳትና ለመቀባት ጥቂት ሳምንታት አስፈልጎ ነበር። ሁሉም የቤተክርስቲያኗ ቤተሰቦች ሴት ወንድ ልጅ አዋቂ አዛውንት ሳይል ከልብ በሥራው ተሳትፈው ሕንጻዎቹን የበለጠ እንዲጸዱ አድርገዋል፤ የመድኃኔዓለም ቸርነት ምንጊዜም አይለያቸው።

በቤተ መቅደሱ ላይ ተሥለው ያሉትን ቅዱሳት ሥዕላት የቤተክርስቲያኗ ቤተሰቦች ገንዘብ በማዋጣት በሠዓሊ እንዲሳል አድርገዋል። ለሥዕሎቹ ወጪ አስተዋጽኦ ያደረጉትን ሁሉ በተጨማሪ በማቀነባበሩም ያገለገሉትን ዶ/ር ዓለማየሁ በቀለን ወሮ ወሰን ጉግሳን አቶ ኤፍሬም ክፍሌን ቤተክርስቲያናችን በጸሎቷ ታስታውሳቸዋለች። ይህ ሁሉ በቅደም ተከተል ተስተካክሎ በኋላ በእኛ አቆጣጠር መጋቢት 27 ቀን 1992 ዓም (በምዕራባውያን በ1999) ታቦቱ ለእለቱ ካረፈበት የድንኳን ማረፊያ በተጋበዙ ብዙ ካህናት፤ ዲያቆናትና የቤተክርስቲያናችን ቤተሰቦች፤ የቺካጎና ያካባቢ ስቴቶች የኦርቶዶክስ ተዋሕዶ ተከታዮችም በተገኙበት ታጅቦ ከቤተክርስትያኗ በዝማሬ በእልልታና በጭብጨባ ገባ። ስለዚህ በቺካጎ ከተማ፤ 9805 ደቡብ ኮሜርሻል ላይ የነበረው ቅዱስ ሚካኤል የሰርቢያኖች ቤተክርስቲያን፤ ደብረጽዮን መድኃኔዓለም የኢትዮጵያ ኦርቶዶክስ ተዋሕዶ ቤተክርስቲያን ተብሎ በክቡር አባታችን ተሰየመ ። አገልግሎቱም እየተጠናከረ አባታችን ሊቀሊቃውንት አባ ተክለሚካኤል በመሠረቱትና ቤተክርስቲያኗን ተባብሮና ተደጋግፎ በመምራት የተዉልንን ፋና በመከተል ቀጥሎአል። ወደፊትም ቤተክርስቲያኗ ስትቋቋም ጀምሮ የነበራትን በር ምቱ ይከፈትላችኋል እሹም ታገኛላችሁ ባለው የወንጌል ቃል መሠረት ምእመናኖችዋ ከቸሩ መድሓኔዓለም ጋር በመገናኘትና መንፈሳዊ ህይወታቸውን በማዳበር ለልጅልጅ የሚያስተላልፏት እንድትሆን የተቀደሰ ፈቃዱ ይሁንልን፡፡